అచల! అరుణ! అరుణాచల! భవ! శివ!
అచర చర జగచ్చాలక! మామవ...
అనలలింగ! ఆద్యంతరహిత! హిత!
కనదార్ద్రోత్సవ కలిత వైభవ!
వినతదైవ! విదివిష్ణ్వర్చితపద!
ప్రణవజ్యోతిః స్వరూప! శంకర!
అనఘాపీతకుచాంబారాధిత!
అనుపమయోగిజనాశ్రయతత్త్వ!
వినమితమునిజనవేద్య! రమణీయ!
ఘనషణ్ముఖ వాక్కమలమరంద!
వివరణ: ‘అచలోయం సనాతనః’ – పరిణామములేని
శాశ్వత స్థిర తత్త్వం అచలం. అదే
స్థాణువు’. ఇది శాశ్వతం కనుక సనాతనం. ఆ
బ్రహ్మము యొక్క శక్తి అరుణం. అచలమైన శివతత్త్వం, అరుణమైన శక్తితత్త్వం – కలగలిసి అరుణాచలం.
అదే చర, అచరమైన జగతిని నడుపుతున్న భవ, శివ స్వరూపం. అది నన్ను కాపాడాలి.
అగ్నిలింగంగా స్వామి అరుణాచలంగా వ్యక్తమయ్యాడని
శివపురాణం. మొదలు, తుదిలేని హితకర శివస్వరూపమిది. ఆర్ద్రానక్షత్రం నాడు శివలింగం
ఆవిర్భవించిందని ఆగమోక్తి. దానిననుసరించి వైభవంగా ప్రకాశవంతంగా అరుణాచలేశ్వరునికి
ఆర్షోత్సవం జరుగుతోంది.
ఓంకార జ్యోతి స్వరూపమై, లోకాలకు
శం-కరమైన శివుడే అరుణాచలుడు.
అనఘయైన అపీతకుచాంబచేత ఆరాధింపబడుతున్న
అరుణాచలేశ్వరుడు, అసమాన యోగులకు ఆశ్రయమైన పరతత్వం. వినయంతో (శాస్త్ర శిక్షణతో)
మునులైన (మననశీలురై – మౌనులైన) వారిచేత తెలియబడే వాడవు నీవు. అది
రమణీ’యం.
షణ్ముఖుని ఘనమైన మాటల కమలాలలో సారభూతమైన
మకరందం అరుణాచలేశ్వరా! నీవే.
0 comments:
Post a Comment