గంధమాదన వాస! బంధమోచన ఈశ!

బ్రహ్మశ్రీ సామవేదం షణ్ముఖ శర్మగారు వ్రాసిన "శ్రీ రామదూతా! జయ హనుమాన్!" ఆల్బం నుండి
ఆంజనేయ తత్త్వాన్ని ఆవిష్కరించే ధ్యానయోగ్యమైన కీర్తన

గంధమాదన వాస! బంధమోచన ఈశ!
బంధురకృపా! ఆత్మ బంధూ! మహేశా!

సువర్చస్సే నీదు శక్తి స్వరూపము
బ్రహ్మచారీ! మంత్రమయము నీరూపము
జానకీరఘురామ హృదయానందా!
కదళీ వనావాసా! సుగుణా విభూషా!
గంధమాదన వాస! బంధమోచన ఈశ!
బంధురకృపా! ఆత్మ బంధూ! మహేశా!
రానున్న కల్పమున కానున్న బ్రహ్మా!
సుగ్రీవసచివా! స్వరకోవిదా!
రామబంటువు నీకు బంటు నేనయ్యా!
పాదమందెద నన్ను పాలించుమయ్యా
గంధమాదన వాస! బంధమోచన ఈశ!
బంధురకృపా! ఆత్మ బంధూ! మహేశా!
రవినిగురువుగ చేసె నీ వినయ వీర్యము
భాస్కరుని తాకినది నీ భవ్య బాల్యము
దుష్టులను దునుమాడు నీ వామహస్తము
శిష్టులను కరుణించు దక్షిణపు హస్తము
గంధమాదన వాస! బంధమోచన ఈశ!
బంధురకృపా! ఆత్మ బంధూ! మహేశా!